] إنتهت مباراة أمس بالتعادل السلبي تلاتة أصفار.
] صفر مازيمبي وصفر الهلال وصفر الثابت دوماً وأبداً.
] تلاتة أصفار.
] وخرج أبو الهل بنقطة أخير عدمها.
] وقد تكون الأولى والأخيرة له هذه السنة.
] نقطة الهلال أمس أخير عدمها بتاعنا أول أمس.
] نقطة لاتغني ولاتخرج من صفر.
] وكلمناكم.
] قلنا ليكم طريقة إدارة الرياضة عندنا مابتأكلنا عيش.
] هذا الوسط الرياضي يجب أن يتطور ويغير مفاهيمو.
] إعادة أهل الرياضة الهربوا منها إليها هو أول الخطوات.
] لاتسبقه خطوة إلا تفكيك الوسط الرياضي.
] نعم.
] أول حتة دايرة تفكيك هي الوسط الرياضي.
] لما إعترته من عيوب إعتلاء مناصب القيادة فيه والتخطيط وجوه لاعلاقة لها بالرياضة من أساسو.
] سياسات علوق الشدة مابتنفع.
] زي قصة الوجيه فلان يدعم ويوفر ويسجل ويعد.
] بناء فرق البطولات يختلف عن بناء فريق لبطولة واحدة.
] وبناء دولة للبطولات يستوجب الاستعانه بقيادات رياضية مؤهلة من أهل الرياضة تعمل بتجرد بعيداً عن قبلية الألوان.
] تدرس وتخطط وتنفذ وتنسق وتراقب فتحصد.
] غير كده فلننتظر كل عام راع جديد لنفس الرعية.
] ولنتحمل كل عام فضيحة جيدة كروية.
] ولنقبل كل عام غياب عن نهائيات المنافسات الأولمبية.
] ولا يزال النادي يبحث عن راع ويتحرى الرعاه حتى يكتب وسط الأندية من الرعية.
] مجرد رعية.
] أيها الناس.
] مازيمبي بتاع أمس ده كان خلوهو براهو في الميدان بطلع مغلوب.
] فريق لم يتبق منه سوى الاسم وكاتومبي وأناقة الأزياء.
] وبعد ده عوض تعادله على أرضه في الحمام.
] لأنو لقى حمام الملك فاروق مالقاهو.
] أيها الناس.
] يانشتغل بجد زي باقي الدول.
] يا نستمر في دافورينا وغياب السلة عن حوارينا وموت السباحة بين ظهرانينا وفقدان الطايرة الإتنست لينا ويا حليل التنس وأولاد طلعت فريد يا حليلنا.
] المهم.
] كيف يذهب سوداكال ومجلسه.
] سؤال حير أهل المريخ.
] ولما غلبوا حيلة.
] سألوا عمك قوقل.
] قال ليهم وأنا شن عرفني؟؟؟.
] مشوا وداعية.
] ختوا بياضهم وقعدوا.
] كشكشت ورمت.
] عاينت مسافة.
] وخمت الودع وتاني رمت.
] هبشت ودعة.
] وخلتها.
] هبشت التانية.
] قالت ياربي!.
] خمت الودع تاني ورمت.
] قالوا ليها ياحاجة أنتي مالك بقيتي زي سوداكال؟.
] قالت ليهم كيف يعني؟.
] قالوا ليها ترمي وتترجمي ومابتكلمينا.
] براك الفاهمة ونحنا قاعدين ساي.
] قالت ليهم ماكدي.
] لكن في شيء أبيتوهو مملح أسي كايسنو ناشف.
] ده السبب المقعد الزول المحيركم ده.
] قام واحد منهم قال ده خلي بالكم إجازة نظام أكتوبر ٢٠١٩م.
] في الوكت داك لو ما أبيناهو مملح ماكان كايسنو أسي ناشف عند ست الودع.
] أيها الناس.
] العزاء الوحيد.
] كلنا في الهوا سوا.
] الحمام كلو طاير.
] بس الخوف الحمامة الحمراء تحطم الرقم القياسي الخارجي بتاع السبعة ديك.
] مابعيد أي شئ زاد.
] المهم.
] في خبر عن الجنيه العام.
] ولا لسة ماعبر؟؟؟؟.
] سيعبر.
] أصبروا.
] أيها الناس.
] إن تنصروا الله ينصركم.
] أها
] نجي لي شمارات والي الخرتوم.
] كان شفت يا والينا.
] كل الأمة على القيف بتقيف منتظره الجنيه العام.
] بغرق ولا بجي حازمها؟؟؟.
سلك كهربا
ننساك كيف والكلب قال قلتوا الجنيه عوام ونسيتوا أنو البحر بشيل عوامو.
وإلى لقاء.
سلك
الانتباهة
