والله اني لأحب هذا الطيب وأغرق تماما عند قراءة كل ما يكتب لانه يكتب بعمق معرفي وشغف صوفي وروح سودانية فتأتي كتاباته على وزن السهل الممتنع لذا اقترحت عليه ان ابر قراء موقعي (شوتايم نيوز ) بهذا الابداع
يوميات علوب
البيوت ( أقدار )
زمان كنا بنذاكر مع بعض أنا ومعانا واحد في الفصل اسمو أمير … ( أمير عبد الملك ) ناس مرتاحين كدا أبوهو دا كان شغال في أرامكو السعودية دي بالسنين
لحدي ماهو براهو قال ليهم كفاني خلاص ماداير ….!!
….و ( أمير ) دا زول كويس كدا مؤدب وما شايف حالو ونحن ذاتنا بي فلستنا دي لو حسينا بيهو كدا والله يمشي هو وقروشو …!! نعمل بيهو شنو …!! نحن كبيرنا الله …!!
ومعانا صاحبنا تاني اسمو ( فتح العليم ) بتقول ليهو فتحي دا كمان طيبان شديد …
ود لطيف كدا وشاااااطر ..نضارتو قعر كباية
بعذب الرياضيات دي عذاب … تشوفو كدا مسكيييين
لكن سبحان الله ( التوافيق والتباديل ) ديل بفطرو معاهو
( أنا كنتا قايلن من الجن …) ..
وأنا برضو كنت شاطر في العربي و أمير دا بعرف إنجليزي كويس ….قرا في مدارس انجليزية في مجمع أرامكو دا قبل ما يجو السودان …
فقلنا نذاكر مع بعض ونتبادل الفايدة
اتفقنا كل مره نذاكر في بيت واحد فينا
أها لما مشينا بيت ناس ( أمير ) دا لغينا الاتفاق واكتفينا بي بيتم …!! قلنا السلام من الداخل
لكن هو ما بيت ….!! 😍
يازوووول الكراسي دي تتطاقش( تغتس فيها ) …
والطرابيز مشتته زي التسالي ….!!
ولا الستاير …!!
( مسرح بس )
وأنوار كدا ما بتعرف ذاتا جايه من وين …..💡
فتح العليم يعاين سااااكت ويضحك ….
قاعدين أنا وهو في الصالون منتظرين أمير دا
قال لي أبوي امبارح خابتني قال حرقتا اللمبه باللوليع الكتير ……!!
قال أبوه بسك اللمبات المولعة زي رجل الخط ….
البلقاها مولعة من غير شغلة برجما رجم الشياطين
( كان يجي يشوف الديربي دا ) 💡💡💡💡💡💡
المهم قعدنا في طربيزة المذاكرة
جات الشغالة شايلة لينا العصير ….!!
( مسلسل بس )
أول مره اشوف ( منقة ) بالصفار دا
( تسر الناظرين ) … )
….( الشغالة ذاتا شغالة )
نحن طبعًا المنقة دي ( بنمعطا حية )
لو ما قالت واي كفاي ما بنفكها الحنينة
مرات لم ننسجم بنخش في دردشة مع بعض😂😂
عزف راسو عدييييل معاها غميتة عيون كدا وغرودة
) …!!
لما خلاص تنشف وشعراتا ديل يطلعن
هي ذاتا بتقول ليك بالغتا وتقرب تديك شبال
العضم ذاتو كان بتجازف كان جازفنا …
عالم تاني ياخ …
المهم رصينا الكتب للمذاكرة …وتركيز مافي …!!
بنتفرج في المتحف دا ….جنس لوحات معلقة …..!!
نحن كان بالغنا لوحة الطفل الباكي داك
( نحن نبكي وهو يبكي ) …!! 😭😭
هو الود دا مالو …؟؟
وتماثيل تقيلة 🤽🏽
( الناس ديل كفار ولا شنو )
بعد شوية البت دي تاني جات …..!!
قالت لينا نجيب ليكم ( السوب ) هسا ولا بعدين ..!!
( عوقتنا البنية…!!
سوب ) …!!؟؟؟ 😳 دا شنو كمان ….!!؟
يا الرسول ….!!
وخجلانين نسأل ..
فتحي قال ليها ( ايوا ممكن والله ) ..
قرصتو ليك بي تحت
قلت ليهو هو شنو الممكن 😡
إنتا قايلا غيار جرحة …!!
اعمل أي حركة ياخ ….!!قول بعد شويه ….!؟ ماهسا …!!المهم أي حاجه …!!
انت هسا السوووب دي هي ذاتا عرفتها شنو
…؟؟؟ إمكن مكوة
قال لي كلامك صاح والله ….
قال ليها خلاص خلاص بعد شويه …!!
( ويستعدل في نضارتو كل دقيقة ..) 👓
هو بتكلم سريع كدا …عندو الهترشة
قالت لينا اوكي …!!
لنتل ولا مشروم ..؟؟
هياااا اهلنا …!!
نحنا الليله يمرقنا الله من الحفرة دي ..!؟؟؟
يمين مقابلة السفارة ماكداً…!!
المهم ربك رب الخير
في اللحظة دي ( أمير ) جا خاشي قال لينا والله ( كاتي ) دي
( كاتي ) طلع اسم البت الشغالة دي )
( انا قايلا المروحة )
قال البت دي بتعمل شوربه غريبة
وأنا شايف تختارو المشروم …..
الله اكبر ولله الحمد ( السووب ) طلعت شوربه
لما عيونًا فتحت ….!! ( ماشين كويس ) …!!
فتحي دا ما ذكي كمان داير يعرف الخيار التاني
قال لي ( أمير ) أنا غايتو ما بحب الممممم ماشروم دا
( بقى يرترت )
وأنا الضحك كاتلني
( قلت لي كدي إنتو اتعرفو على بعض اول …الحب بجي بعدين )
أمير ببراءة كدا قال ليهو خلاص إختارو بتاعة العدس برضو خطيرة
احممممدك يارب طلع عدس …شوف العزة اللقاها ( العدس ) ..
نحن بناكلو حبوب…!! هنا بشربو سووب
وعدس الوااااابل 🎼👏
الإتنين بي صوت واحد قلنا ليها ( عدس ) …!!
( فعلاً مرمي الله ما بترفع ) …!!
جابو ليك الشوربة 🍵🍵معها حاجه زي المريلة كدا
والله كأننا داخلين عمليه …..
شربنا الشوربه وكانت المره الثانيه منذ سنوات نغير فيها الصنف …!!
الأولي والأخيرة كانت شوربة الكوارع ….!!
نتناولها برفق عند واحده كدا في أم درمان … اسمها
( الرجبية )
بعد تشربا بتحس إنك ماشي بي راسك
لكن بي أمانة بتاعك ( رجبية ) أطعم وأحلى …!!
( ولا نحنا العواليق ما عارف ..!! 🤔) ….!!
المهم بعد داك بدينا ليك في المذاكرة
واليوم كان ( رياضيات ) وقال كدا فتح العليم دا ( فتح )
جضما زي ماقال فيثاغورث
فرقصت ( الصاد ) 💃وتمايلت ( السين )
نطتت ( ظتا ) وفرحت ( جتا )
وبذات دهشتنا في ( السووب ) كان ( أمير ) يتابع هذا الساحر وهو يتلاعب بالمعادلات والأرقام كيفما شاء ..!!
…..يرفع الأس ….ويملأ جيب التمام ….يحلف على الدائرة بنق٢
فيضرب ( مركزها ) ….ويعزف ( الوتر ) ….!!♾
البتاكلو ينفعك إنتا ان شاءالله ….!!!
أها ( أبو أمير ) دا جانا داخل …..
لابس ليك الروب بتاع المسلسلات داك… والكدوس
أنا قايلو ( كمال الشناوي ) ….!!
سلم علينا وتمني لنا التوفيق وعبر عن سعادته بنا ونحن نتبادل المعرفة …..
بكون ( أمير ) حكى لى عن ( الشفوت ) ديل ……
…..
قال لي ( فتح العليم ) إنتا والدك ياهو عبد القادر الخزين بتاع ( بنك السودان ) دا ولا إسم على إسم
فتحي قال ليهو لا انا أبوي بزرع …!!
عندو حواشة كدا ..!!
(طلع ابوهو السودان ذاتو ) 😍✌️✌️
اممممممك ……أنا اخو السمحة
حرررم تبشر
✊✊
الله يخدر ضراعو ….
قال لينا تعرفو يا ابنائي
السودان دا النفط بناعو الحقيقي هو الزراعة دي ….!
انا اشتغلت في أرامكو دي ( صبعتاشر ) سنة زي الخير الفي البلد دي مالاقاني …!!
قربتا أقول ليهو نحن عايشين هنا عمرنا كلو برضو ما لاقانا 😂😂😂
( وما زلنا في انتظار هذا الخير على رصيف الأمل )
إتلفت على ولدو أمير دا قال ليهو عمك ( صابر ) الجناينيقال بتو عيانه مشى البلد …..!!!
مشكله كبيرة دي
كدي شوف لينا حد …!! الشجر دا محتاج عناية …!!
( نحن غايتو محتاجين جلكوز عدييييل ) 😂😂
طبعًا حجم المشاكل بختلف من زاوية النظر و ( الجيب )
مشكله ( الشجر ) دي بحلها صابر ..!!
مشكاة ( البشر ) دي البحلها منو …!؟؟
وشعبك برضو ( صابر )
وطبعا ناس ( أمير ) ديل عندهم برضو سواق كدا شغال مدارس وأسواق .. دا غير ( كاتي ) واخواتها ..
يعني توظيف بس في البيت دا أكتر من الحكومة
المهم انتهينا من المذاكرة قالو لازم تتعشو ….!
اعتذرنا بلطف …ما يقولو كمان ديل شنو الناس الجعانين ديل
( العشا بكون ورقة الكيميا )
ونحن طالعين كدا لقينا ( كديسة ) حلات الدنيا عليها 😽
فتح العليم قال لي ( أمير ) دايماً ما تخلو الباب دا فاتح الكدايس دي طوالي بتدخل …!!
👏👏👏👏 الصفقة لي ( فتح العليم )
تاني قرصتو ليك ( الفقر دا ) قلت لي امانتن في ذمتك هسا دا شكل كديسة مضهبة …
شوف الكحل دا …!!
يكون بي نضارتو دي ما شايف ( الكرفتة ) الرابطنها للكديسة دي…🧣
فعلاً ( أمير ) قال ليهو لا ياخ دي كديسة ( عزة ) أختي
اسمها ( بوسي ) دا مواعيد العشا بتاعا ..!!
( اول مره نعرف انو العشا عندو مواعيد ) ….!!
مشاعر كل يوم لابدا ليها لي كديسة مجهولة الهوية كدا عندنا بالخرطوش الاسود ..قالت قبل يوم كم دخلت دفقت اللين وحالفا إلا تسمما ….!! 😳
( حنينة شديد اختي دي ) 😍
( بوسي ) بي هنا تشيل وتعاين فينا فضل ليها تقول لينا نشيد العلم ….😻
وجنس أدب و أخلاق ….الله يحفظا بس 😽
المهم جيت داخل البيت لقيت مشاعر والشعر منكوش إتذكرتا ( عزة )
قالت لي أها ( الطقة ) كيف …!!؟؟
قلت ليها أنا ما داير حاجه اعملي لي شوية ( سوووب ) ..!
أمي راقدة هناك قعدت في نص السرير ودقت سدرا بي يدها كدا وقالت ليها سجمي علوب مالو ..!؟؟
وقع ؟؟ 😳
قايلاها ( مكمدات ) ….!!
مشاعر قلت ليها سوب سوب يا حاجه سوووب يعنى شوربة ….
القليصة دي كمان جايبا خبر أي حاجه …!!
الحاجه قالت لي كر علي يا علوب ما تكون حاسي بي حاجه …!!
قعدتا اضحك براي أتذكرتا ( كاتي ) …
( الشوربه عندهم قبل الأكل ونحن عند اللزوم )
مشيت جبت ليك الفولة المسؤولة من عمك يس …
( القدرة تاكلنها بي طوبة التقول مجنونة ) …!!
وبي هنا مشاعر قطعت ليك البصل 🧅والطماطم والشطة وزيت السمسم الأصلي داك …والشمار ريحتو طاقا وجبنة جايبنها لينا ناس طلحة من الدويم ….وتدق ليك في التوم دا أدبتو أدب مع الفلفل الاخدر )
( لقاء الكفرة ) 🧄
وأنا برضو عزيتم ليك بالبيبسي الباااارد والحاجة بتشجع ( السفن آب ) جبت ليها اتنين مايفوتكم نطق الاسم من خشيما السكر ( سبنوب ) 😂 ( الله يحفظا ) وعيش حاااار
ختيناهم ليك في نص الصينية ….جزء فتة وجزء عادي عشان
ننوع الأطباق …😂😂
ونزلنا ليك فيها …!!
ضرب من أمو ….!!
ناكل ونتقاسم الفرح والأمنيات …..!!
عبير قرشت ليها قرن شطة خدرا في نص الفول
🌶
قامت تولول وتنطط …الا لحقناها بالموية …!!
فطوم انشقت بالضحك ….. وكلنا قعدنا نضحك …..!!
ومن الأعماق …!!
حيث لاتعرف السعادة كرسيًا أو جدار
هي فقط تستهدف النفوس والقلوب
وليس الله بظلام للعبيد ….!!
اللهم أدمها نعمة واحفظها من الزوال …!!
وعود لينا ياليل الفرح ..🌹
كانت لنا أيام
ياربي ( بوسي ) بتكون إتعشت بي شنو….!!!؟ 😻