بابكر سلك : ثم ماذا بعد هذا

*أسدل الستار على الإحلال.
*لكن لي أسي ماعرفنا الإبدال.
*كلو يوم نسمع المريخ يكسب.
*ونشوف صور لنفرين تلاتة شادين عضلهم بشعار المريخ .
*وماعارفين المشتت منو أو الشتت منو.
*طبعاً كأي تسجيلات.
*المريخ يتسيد الساحة.
*وتسجيلات برؤية فنية.
*المريخ يكمل النواقص.
*المريخ يظفر بنجوم الساحة.
*وطبعاً مافي تأكيد إلا الميدان يا حميدان.
*كل السجلناهم ديل قبل شهور كانوا قاعدين .
*وسجلنا غيرهم.
*وغيرهم السجلناهم قريباً.
*لا استبعد أن يكونوا أول المغادرين.
*وديك برضو كانت تسجيلات فنية ونوعية .
*أصلوا ماحصل سجلنا.
*قلنا تسجيلاتنا دي إدارية.
*وسرعان مايظهر أنها كانت تسجيلات خنفشارية سمسارية.
*كل اللاعبين في البلد دي مستواهم واحد.
*فقط المحظوظ منهم هو من يلتحق بالقمة.
*والدليل أن القمة التي تكوش علي سوق اللاعبين .
*تاتي وتتعادل وتخسر من اندية ماكاوشت علي سوق اللاعبين.
*والقمة عشان تغلب القاع في الدوري.
*تعسكر الدوري كلو.
*ويجوا الجماعة من بيوتهم وينتزعوا نقاط من القمة التي كاوشت على سوق اللاعبين وعسكرت السنة كلها.
*والقصة دي مابتتحل منفردة.
*لازم يتغير (سيستم) إدارات الأندية كلو.
*الإداري يعرف حقوقو وحدودو.
*مايدير على طريقة أنا أدفع أنا أقرر.
*ولا على طريقة أنا لا أدفع إذاً أنطم وأقفل الإتنين بالخمسة.
*اللاعب لازم يعرف العليهو قبال الليهو.
*والجهاز الفني يجب أن يعمل بشخصية قوية لاتؤثر عليها الإدارة بتدخلها .
*فالإدارة لاتمن على الجهاز الفني براتبه.
*ولكن العقد مع النادي هو سيد الموقف.
*والمدربين لو عرفوا كده.
*بكربوا عقودهم صاح وبعملوا في بيئة صالحة .
*وقصة زولي وزولك.
*وقصص الكيمان المزقت الكيان.
*وحكاية المشجع البتمدد في مساحات الإداري.
*أشياء كتيرة لو ما أتغيرت.
*كلو سنة حانظفر بنجوم التسجيلات.
*ونطير على المقعد الأخير للمجموعة.
*فالمال وحده لايصنع فريق بطولات.
*ولكن حسن إدارة المال هو نجاح للإدارة وهو هدفها الأساسي.
*فإذا كنا نفشل في إدارة موظفي وعمال النادي.
*بالتأكيد سنفشل في كل شي .
*المهم.
*هاردلك لعشاق الأهلي المصري الخسارة من المصري.
*أيها الناس.
*قصة بكري أوعى تكون راجعة لتلك الإصابة.
*الإصابة التي شخصها دكتور النعيم وأتى بمنحة العلاج من إتحاد جدة

الانتباهة
*ولكن الله كان غالب.
*فهل هي نفسها تلك الإصابة؟.
*أها .
*نجي لي شمارات والي الخرتوم.
*والينا المكلف علينا.
*درجة الحقارة في الجو حيرتنا يا أخينا.
*ما من خططكم البلد دي تكندشوها لينا؟؟؟.
سلك كهربا
ننساك كيف والكلب قال الكنكشة بتخلي الكندشة تضرب فينا؟.
وإلى اللقاء.
سلك.