بابكر سلك : سن القوانين وسن السكاكين

*سن القوانين أو اللوائح لما يبقى تفصيل بالمقاس التمتع بسلطة أو للخروج من مأزق .
*يبقى سن سكاكين لذبح ديمقراطية كنا ننشدها.
*ويقال أن مولانا الليلي قد استقال لهيك أسباب.
*إذا صحت الاستقالة.
*وصحت هيك أسباب.
*يبقى سيادة القانون لو إنضبحت.
*أهلية وديمقراطية الحركة الرياضية تبل رأسها.
*وأمتنع عن التصويت.
*المهم .
*حال مجلس المريخ بشقيه.
*يذكرني أيام كنا طلاب بجامعة القاهرة فرع الخرطوم.
*الحنينة السكرة .
*وقتها كان هناك جدل استمر لما أتخرجنا .
*هوية الجامعة.
*هل هي سودانية أم مصرية.
*وتقام على ذلك الجدل أركان النقاش.
*ويطلع السيخ.
*السيخ كانوا بقروا معانا.
*وكانوا بجيبوا السيخ يدسوهوا في الجامعة.
*جدل كان كبيراً
*وسؤال حائر.
*شخصياً ماكنت شغال كتير بالحتة دي.
*لأني قلت لي نفسي.
*جامعة اسمها القاهرة واستاذها مصري وكتابها مصري ومقررها مصري وخفيرها مصري وفراشها مصري وسجايرها كيليوباترا.
*تبقى سودانية كيف بس!.
*الآن مجلس المريخ حائر بين الواقع والأمنيات.
*فهل تصبح الأمنيات واقع برغم السجاير كيليوباترا؟.
*أيها الناس.
*تتذكروا لما الفيفا جمدتنا؟.
*تتذكروا جمدتنا ليه؟.
*أذكركم .
*موش النائب العام وقتها طلع أمر للشرطة عشان تخلي مقر الإتحاد السوداني من المجلس القاعد وتسلمو للمجلس الجديد؟.
*طيب كيف نمشي نحنا للنائب العام عشان يطلع أمر بإخلاء الاستاد والنادي من آدم وربعه وتسليمه لأسد وربعه؟.
*يعني إصرار على التجميد أم نسينا الماضي الجمدنا؟.
*قانون كهيه بالكل نهي.
*تم إنتخابات باجا .
*فالديمقراطية نار ونور.
*دعونا نصلى بنارها لنستمتع بعد ذلك بنورها .
*وإن شاء الله يوم نورها برمجة القطع ماتكون علينا.
*أيها الناس.
*درب القانون هو أقصر دروب الوصول مهما كان.
*وإن كانت لسوداكال حججه.
*فالقانون حجة على الكافة.
*كل محاولات إبعاد الرجل لم تكلل بالنجاح.
*لأنها وإن سلك بعضها درب القانون.
*إلا أنها كانت تحيد عن التراك.
*لذلك لم تصل لنقطة النهاية.
*وإذا عجز القانون عن إرساء عملية التداول السلمي للسلطة بالمريخ .
*يبقى نشوف ناس لاهاي ديل.
*ونقول ليهم كشفكم ده لو فيهو فرقة.
*أضيفوا آدم عبدالله سوداكال.
*وأكتبوا جمبو بين قوسين(كوشيب تو).
*أيها الناس .
*نسأل الله أن ينير الدرب ويرسي الديمقراطية بالمريخ في تداول سلمي للسلطة تحت مظلة أهلية وديمقراطية الحركة الرياضية.
*أيها الناس.
*إن تنصروا الله ينصركم .
*أها .
*نجي لي شمارات والي الخرتوم .
*تعرف ياوالينا .
*زمان أهلنا قالوا لينا.
*شبعو حتى تطبعو يا أخينا .
*يبقى الجوع هو السبب الأساسي للسرقة المنتشرة فينا.
*معقولة الزول سايق عربيتو بيد وماسك الموبايل بيد وقاعد في الشنطة وعافص الجزلان؟.
سلك كهربا
ننساك كيف والكلب قال واحد سايق عربيتو سرقو بطاريتو لما وصل لقاها مافي….شدة الحرامي السرق التلفزيون والناس بتتفرج على المسلسل والمسلسل شغااااال.
وإلى لقاء.
سلك

الانتباهة