*لابورتا على طريقة سودا.
*قال برا ميسي برا صرف دولار برا غربال.
*مجموع رواتب اللاعبين عندهم يجب أن لايتجاوز نسبة محددة من الأرباح التي يحددها النادي.
*عشان النادي مايدخل في ديون تلعن أبو خاشو .
*ده اللعب النظيف مالياً.
*نحنا طبعاً أهل خمج .
*خمج نضيف.
*نخمج للبوبار ونجيب لاعب كرعينو الأتنين شمال.
*نخمج من أجل تكسب السماسرة الذين أن لم يتكسبوا تحولوا لجماجرة كباااااار .
*مابتتبلى في خشومهم فولة .
*الفيك والمافيك فيك.
*الأندية الفاهمة وبدون قوانين ولوائح ملزمة لها .
*بتعمل جاهدة أن لاتدخل في مديونيات تفوق مقدرتها بكثير عند السداد.
*ومجلس الإدارة الواعي مابورث مديونيات باهظة ومرهقة ولاقبل للنادي بها لمجلس الادارة الذي يعقبه .
*فعبارة بالدين نسوي الزين مابتودي لي قدام .
*ياخ شوف بس مجموع مديونيات اللاعبين والمدربين في ذمة المريخ أمام الفيفا؟؟؟؟.
*دي في حد ذاتها مؤشر بوريك الطريقة التي ندير بها أنديتنا.
*ناس الفيفا قربوا يكتبوا لافتة يعلقوها في خشم باب مكتب الشكاوي مكتوب فيها.
*مكتب الشكاوي على المريخ السوداني.
*كلها دين ماسوينا بيهو أي زين ونهواهو في كل الظروف والقادم أحلى.
*لذا .
*الإدارة الناجحة وقلبها على الكيان.
*يجب أن تلزم نفسها بسقف منصرفات لا يثقل كاهل النادي.
*بشطارتها يمكنها أن توسع مواعين الدخل للنادي بالاستثمار في الأرض والشعار والجمهور والفريق .
*ثم ترفع بعد ذلك سقف الصرف ليصل للطموح.
*المهم .
*ناس مرشحة بي جاي وناس مرشحة بي جاي.
*وناس مرشحة بي جاي وبي جاي.
*على طريقة كان كورك ولد وكان كوركت بت .
*معظمهم لابرنامج لهم .
*ترشيح اسكتو .
*طيب .
*إذا في زول فاز وعندو برنامج .
*وفازوا معاهو ناس برنامجو ده مانافع معاهم .
*الدبارة كيف؟؟؟؟.
*موش مفروض يكون في تنسيق قبلي؟.
*إذا كان باب الترشح بقفل أتوماتيك مع باب العضوية .
*حانجيب التنسيق منين ياحسرة!
*أيها الناس.
*بالذات في ظل الظروف الإقتصادية الصعبة دي .
*مفروض الإدارات تمد رجلينها قدر لحافها عن طريق خطط تنمي النادي كمؤسسة وترتقي بالمستوي الفني لفرق المناشط المختلفة .
*كورتنا تحتاج لتأسيس .
*كل رياضتنا تحتاجه.
*وطالما نحن نؤسس في دولة.
*دعونا نؤسس في خط موازي للرياضة .
*وتأسيس الرياضة يبدأ من إدارة الرياضة على مستوى الدولة وحتى أصغر نادي في أبعد بقعة عن السنتر.
أيها الناس
*إن تنصروا الله ينصركم .
*آها.
*نجي لي شمارات والي الخرتوم.
*كان شفت يا والينا.
*صاعقة أول أمس قايلنها وقعت فينا.
*لمن قعدنا نبكي علينا.
*والمطرة صبت يا والينا .
*كل البلد صابة .
*مازي زمان تصب بالمحليات.
*الوكت داك محلية مادفعت نقطة مابتنزل يا والينا .
*لكن الخيران الكبيرة الماشة البحر حيرتنا يا والينا .
*موية البحر مارقة بيها لي برة.
*وموية المطر جاية بيها لي جوة.
*والضبان سعيد والباعوضة قاااشرة ووا فليلنا .
سلك كهربا
ننساك كيف والكلب قال الضبان والباعوض الموديلات الجديدة دي بقت خدمة 24 ساعة..عشان كده بالليل أعملوا مع الناموسية ضبانية.
وإلى لقاء
سلك
الانتباهة