بالدارجى العميق
حمر ومسيرية
صفوا النية
يوسف البروف
===========
============
جدى الشيخ يوسف بن العمدة الزين بن الزعيم عيسى النشيو شيخ قرية املس التى تقع غرب مدينة ودبندا بحوالى كم وعشرين كيلو كان عندو قضية ارض مع جماعة ساكنين معاهو فى حلتو، اها القضية وصلت قاضى مديرية النهود، يوم المحكمة جدى يوسف والجماعة المقاضينوا بركبوا عربية واحدة، اها طبعا جدى يوسف كان رجل غنى وكريم، على طول بدفع لسيد العربية تمن تذكرتو وتمن تذاكر الجماعة المقاضينوا برضو كمان، مش كده وبس حتى حق الاكل برضو قاعد يدفعوا نيابة عنهم، اها يا زول القضية دى استمرت اكتر من شهرين وفى كل سفرية جدى يوسف بقوم بنفس العمل، الجماعة المقاضينوا قالوا، يا خوانا الشيخ ده نحن عندنا معاهو مشكلة وبعد ده كلو بدفع لينا حق السفر وحق الاكل والله من يوم الليلة تانى ما وقفنا معاهو قدام قاضى، تطير الارض ياخى ويبقا الود والتسامح والكرم والاخلاق والشهامة والرجالة زاتو، اها قاموا مشوا لحدى جدى فى راكوبتو وقالوا ليهو، يا شيخ يوسف ياخى والله نحن اليوم الوقفنا ضدك امام القاضى كان يوم اسود ونحن من يوم الليلة ده طرفنا من الارض ومبروك عليك ارضك ومبروك عليك تربيتك ومبروك عليك اخلاقك وشهامتك وكرمك، جدى يوسف قام قال ليهم، والله انتوا كمان ما حتكونوا ارجل منى، انا كمان على بالطلاق من نساوينى السبعة، التلاتة الفاتن والاربعة الفى حبالى ارضكم مبروكة عليكم، انتهت القضية بكل كرم وشهامة واخلاق واحترام وعفو وتسامح، للمعلومية وشكرا جدى يوسف ده لا عندو دكتوراة ولا ماجستير ولا بكالريوس ولا شهادة سودانية ولا شهادة خلوة ولا واتس اب ولا انستغرام ولا تويتر، الشيخ يوسف عندو شهادة اخلاق ورثها جدا عن ابا سكن وجوار واحترام،
بين حمر والمسيرية الزرق قضية ارض وحدود وده شئ طبيعى، وشئ طبيعى ان تكون هنالك تداخلات فى الجانب الهنا وفى الجانب الهناك، وشئ طبيعى ان تكون هنالك احتكاكات، وشئ طبيعى ان تكون هنالك مشاكل، الما طبيعى والما اخلاقى ان يجد العطالة والعنقالة والحرامية والكسيبين والمدفوعين والمدفورين ومنبوذى الاحزاب فى هذا الخلاف ميدانا ومسرحا لسب القبايل والخوض فى اعراض الاسر، هنالك ارث تاريخى لحلحة مثل هذه الخلافات والتشاكسات وهى الاعراف والجوديات والتقاليد والجوار واخيرا القضاء، اى كلام خلاف ذلك يصب فى صالح اعداء حمر والمسيرية، والله اسوا مافى وسائل التواصل الاجتماعى انها اتاحت لاصحاب العقول المقددة والسراويل المقددة نوافذ يبثوا من خلالها افكارهم المسممة فى المجتمعات البسيطة والامنة، على العنقالة والبلطجية والعطالة ان يتحدثوا خير وسلام واستقرار وتعايش سلمى وجوار تاريخى ونسب وحسب ودماء واحترام وادب او عليهم بتوفير قيقاباياتهم لفتة الفول وصابون اللايفبوى.
على الادارة الاهلية ممثلة فى الناظر الصادق الحريكة والامير عبد القادر منعم ان يتقدموا المشهد حلول واحترام وادب وافكار ويبعدوا العطالة والعنقالة واصحاب الفتن ما ظهر منها وما بطن.