] رمضانات طبعاً كلها سمحة ما قلنا شيء.
] رمضان دائماً كريم وشهر خير وبركة.
] ولكن إذا ما قارنا رمضان ده برمضان الفات.
] نلقى المؤشرات كلها في صالح رمضان ده ولاعجب.
] لأنو رمضان الفات مافهمنا ليهو شيء مع كورونا.
] لليلة ماعارفنو إذن ولا لسة.
] غايتو بفضل الله عدى.
] وعدى دي بتخلينا نغني مع النور الجيلاني.
] عدي بينا عدي بينا ياريس.
] وقف المركب خلي الشباب يركب ياريس .
] المهم .
] رمضان ده كان فيهو بحبوحة ياريس.
] ولكنها بحبوحة ربانية ما كان للحكومة فيها أي دور .
] الحكومة ما اشتغلت بينا .
] لكن ربك رب الخير إشتغل بينا.
] ماهو ماممكن يخلقنا ويخلينا لي خلقو.
] وخلقو ينسونا .
] مابنسوا روحهم.
] لكن بنسونا نحنا.
] ولما يتذكرونا .
] يقولوا لينا أصبروا .
] القصة دي ذكرتني قصة حصلت لي حكاها لي واحد صاحبي.
] قالوا في واحد مفلس الترابة ماعندو.
] عندو مرتو وعتوت.
] جوهم حرامية شايلين سواطير وسكاكين.
] الحرامية فتشوا البيت كلو.
] غير الراجل ومرتو والعتوت مالقوا شيء.
] الراجل والمرة والعتوت صاحيين لكن عاملين رايحين.
] زعيم الحرامية قال للحرامية نكتل الراجل ونضبح العتوت ونزني بالمرة.
] الراجل قال للمرة هامساً
] كوركي قولي الحرامي.
] المرة قالت ليهو أصبر شوية .
] الراجل قال ليها أنتي صابرة ليك فوق رأي.
] أنا وعتوتي ده الصابرين ليها شنو؟.
] دحين ياحمدوك أنت صابر فوق رأي الشعب وعتوتو الصابرين ليها شنو؟.
] ياخ نحنا شدة ماصبرنا.
] محطاتنا سميناها صابرين.
] ياخ نحنا شدة ماصابرين.
] بقينا نشبه الصبرة.
] ياخ نحنا شدة ماصابرين.
] حيرنا الصبر ذاتو.
] صبرنا ياحمدوك لما عجز الصبر عن صبرنا.
] ياخ نحنا شدة ماصابرين.
] ولدنا بنسميهو صابر.
] لو ماعندكم لينا غير كلمة أصبروا.
] بنقول ليكم انتوا صابرين فوق راي
] الشعب وعتوتو الصابرين ليها شنو ياحمدوك؟.
] المهم.
] أطلعت علي كشف بل القضاة ووكلاء النيابة.
] والله قابلتني أسماء لها إيقاع.
] إيقاع في التفاني والفهم والعدل.
] وإفتقدت في الكشفين أسماء .
] أسماء في حياتنا لازالت تعبث بالأشياء.
] فكيف بالله يتم إعداد تلك الكشوفات؟.
] للإجابة على هذا السؤال يجب على لجنة إزالة التمكين أن توضح لنا أمام أي اسم الأسباب.
] وأن نرفع لها أسماء من الأسماء الفي حياتنا.
] يورونا الكشف ماطالهم ليييييه؟.
] أيها الناس.
] ما كل ما تسوء الحياة ويرتفع الدولار.
] تطلعوا علينا بكشف إزالة أعد بعجلة.
] الدولار براهو.
] وإرتفاع الأسعار براهو.
] والفشل براهو .
] وإزالة التمكين براها.
] أيها الناس.
] إن تنصروا الله ينصركم .
] أها .
] نجيء لي شمارات والي الخرتوم.
] كان شفت يا والينا .
] ضاقت بينا.
] ولما استحكمت حلقاتها ضاقت تاني.
سلك كهربا
ننساك كيف والكلب قال أيام الكيزان لما تضيق بفكوا فينا دفارات النظام العام..أسي لما تضيق بفكوا فينا كشوفات الإزالة وفي الحالتين نحنا الصابرين
وإلى لقاء.
سلك
الانتباهة