شرح وافي ومبسط من طالب درس في تركيا يشرح طريقة التقديم للمنح تركيا المجانية لطلاب الشهادة الثانوية…
المنح فتحت يوم 15 يناير 2021 و مدة التقديم شهر يعني بتقفل يوم 15 فبراير 2021
لو عندك اخوك او اختك او قريبك امتحن شهادة ثانوية اقرأ الكلام دا للآخر…
موضوع المنح التركية دا ياخ طلع اسهل من ساهل زاتو
متوفرة كل المجالات و كل التخصصات البكالوريوس
السكن مجاني وداخليات راقية جدا مافي مقارنة بداخلياتنا هنا خالص
الوجبات مجانية فطور غداء عشاء
الموصلات مخفضة بمقدار النصف للطلاب وفي بعض المدن مجانا
وبعد دا كلو بيصرفو ليك راتب شهري تعز بيهو نفسك تشتري ملابس وحركات وممكن تسافر منو عديل في الاجازات سياحة و كدا و برضو بكفي ليك انك تمشي السودان وترجع في الاجازة ونصيحتي ليك ما تتهور مع مطارنا البقفل بالشهور دا 😂💔
شهر خمسة برسلو ليك للمعاينة او المقابلات و شهر ستة برسلو ليك الفيزا
بتجيك التذكرة لحد السودان و اول ما توصل مطار انقرة في موظف شغلو يسوقك من يدك يوديك تكمل اجراءاتك و تعرف جامعتك وين و سكنك وين بدون اي مقابل….
عندك سنة كاملة تتعلم اللغة التركية ودي ح تكون احلى سنة في حياتك تتكلم سااكت و تلف البلد و الشعب التركي بحب التعرف على الطلاب الجدد و التعرف على الثقافات يعني ما بتواجه اي مشكلة في تعلم اللغة
ولو عندك الرغبة تدرس باللغة الانجليزية لازم يكون عندك شهادة ايلتس او توفل و برضو بتتعلم تركي للتواصل…
اهم الشروط:-
ان لا يتجاوز العمر 21 عاما
ان لا تقل نسبة النجاح عن 70%
ان لا يكون الطالب تركي الجنسية
طيب المطلوب شنو للتقديم؟
1/ رقم وطني او جواز سفر اذا توفر
2/ الشهادة الثانوية مع التفاصيل موثقة من وزارة التربية والتعليم و من وزارة الخارجية..
3/ رسائل توصية من ثلاثة اساتذة في المدرسة كحد ادنى و ممكن خمسة او اكتر و كلو لمصلحتك.
4/ خطاب النية او الدافع ..
5/ الشهادات المتاحة و الدورات التدريبية والانجازات الفيها شهادات كلها ترفقها
طيب نفصل شوية:-
كل الشهادات الفوق دي ما بتفرق اذا كانت باللغة العربية او الانجليزية..
تعمل ليها اسكانر كلها و تحفظها pdf وحجمها ما يزيد من 1 ميقابايت
رسالة التوصية:-
ممكن يعملها الاستاذ او المدير باللغة العربية او الانجليزية
لازم تكون مروسة باسم المدرسة و شعارها اذا توفر
لازم تحتوي على توقيع كاتبها و ختم المدرسة
لازم تحتوي على ايميل الاستاذ و رقم تلفونو لأنو مرات بختارو عشوائيا عشان يتأكدو انها ما مزورة و يتواصلو مع الاستاذ
خطاب النية :-
دا خطاب بتوضح فيهو هدفك في الحياة دي بصورة واضحة مثلا عايز تبقى مدير اعمال ناجح و تبين كيف بتساعدك المنحة التركية في سبيل الوصول لهدفك
و اهم حاجة تكسر تلج لي تركيا و اجواء تركيا و طيبة اهلها و حسن تعاملهم و سمعتهم العطرة و اهم حاجة تركز على لغتهم و ثقافتهم لأنو الهدف الاستراتيجي من المنحة هو نشر اللغة التركية و الثقافة التركية و الاهم من كدا توضح ليهم انك عايز تتعلم و ترجع ترفع بلدك و مجتمعك 👌
الشهادات:-
اعمل ليها اسكان في اي مكتبة ولازم تكون واضحة و اعمل كل واحدة في ملف pdf منفصل.
بعد تجهز اوراقك كلها تدخل رابط المنحة و التقديم ساهل جدا و بسيط
وعذرا كنت ناوي اتكلم عن التقديم واشرح الخطوات بالتفصيل الممل الا بس النظارة ما لامي فيها و مصدع لمن مافي طريقة …
لو دخلت الموقع بتلقاهو بسيط و ساهل ولو ما عرفت ليهو تدخل اليوتيوب تكتب “شرح موقع التقديم للمنح التركية المجانية” و في شفاتة ما قصرو شارحين كل حاجة عن التقديم..
رابط التقديم
https://tbbs.turkiyeburslari.gov.tr/
كترو الشير والتاق ….
و بالتوفيق للجميع ان شاء الله
و ما تكسلو من الخطوات البسيطة دي والله بتغيييير مستقبل اجيال..
#اضافة_بسيطة
متاح التقديم حتى لطلاب الجامعات العمرهم اقل من 21 عام